اوعى تتجوزمن دكتورة بشرية

المرة اللى فاتت اتكلمنا عن كرنبة اللى هتموت وتلاقى عريس المرة دى بقى هنتكلم عن الانتيم بتاعتها اللى على النقيض للنقيض منها واسمها مختفية

كل تفكيرها فى الدراسة والكلية وكلمة عريس بتسببلها( ازمة قلبية وعلى الرغم من كده ياريتها بتحب الكلية )

اسيبكم مع مختفية بس اوعوا تدعوا عليا

الدوكتر :ايه رأيك فى الكلية ؟

مختفية:الكلية ياخبر يادوكتر يااااااااااااااه الكلية الكلية دى اقولك يادوكتر هو كان يوم اسود يوم مادخلت الكلية (شكلها معقدة نفسيا)

الدوكتر:ليه يامختفية ؟

مختفية: دى تأبيدة هيا ندخل 17 ونخرج 24 سبع سنين جوع وفقر( ياعينى عليا)

الدوكتر :هو ده كل اللى مزعلك يامختفية؟

مختفية :ياريت كان بس كده بصلى كده يادوكتر (وهتلاقينى شكلى شكل بنت فى اعدادية )

الدوكتر:كل ده فى سبيل العلم ايه يعنى (لما تختفى كل سنة شوية ده انتى هتأدى رسالة للبشرية وهتعملى خدمة قومية )

مختفية :يادوكتر حرام انا دخلت الكلية بكامل قوايا العقلية اما (دلوقتى دول بيقلوا شوية شوية)

الدوكتر :لالا يامختفية انتى بتبالغى شوية

مختفية :اقولك يادوكتر انا كل يوم الفجرية اصحى من نومى بسبب الكلية اصحى اشوف ايه عليا واخد الصدمة اللى هيا( اشى بكتيريا واشى دفتيريا)

الدوكتر :وايه يعنى مش قضية هيا

مختفية:يادوكتر انا فى اول سنة اكلينكية وخلاص( من الرمد اتحولت ومن الانف والاذن اتهبلت ومن الشرعى خلاص مت)

الدوكتر:ماهو لازم تعملى كده يامختفية علشان تبقى دكتورة شاطرة مفيدة للانسانية

مختفية :ياعينى عليا نفسى اخلص الكلية علشان انطلق واعيش بحرية

الدوكتر :يامختفية حرام عليكى هتصبينى( بالسكتة القلبية)

مختفية :سورى يادوكتر ماهو حضرتك اللى سألت وفى المواجع قلبت

الدوكتر :هانت يامختفية كلها كام سنة وتخلصى وتتخرجى من كليتنا دى واشوفك احلى عروسة فى الدنيا(وفى سره بيقول هتكون ماماته دعت عليه و هيغنى صعبان عليه)

مختفية:ايه يادوكتر ده من قالك انى هتجوز ده انا على بال مااخلص هيكون( شكلى خارجة من الاصلاحية)

الدوكتر:تعبت قلبى يامختفية

مختفية: سورى يادوكتر انا عارفة انى نكدية هتعمل ايه بس فيا والله عمرى ماكنت كده انا كنت بنوتة شقية بس كليتكم ديا هى اللى عملت كده فيا

ز
الدوكتر :تانى يامختفية (وفى سره بيقول انا استاهل انا ايه خلانى اكلمها وعلى الجامعة واسألها)هاتولى اقرب شوز اضرب نفسى بيه بس بشرط يكون جديد


مختفية :بقالى كام يوم مش بنام بسبب التفكير فى الامتحانات وادخل الاوضة بتاعتى وافضل اعد فى( مربعات سقفى وممكن كمان الجيران)

مختفية :وكل مااجى اتهور واغنى واسلك احبالى الصوتية الاقى نفسى بغنى غلطة وافضل معلقة عليها حالتى بقت صعبة ومحتاجة استشارية نفسية (ياخوفى على الدكتور واللى هيحصله من مختفية مش بعيد يعتزل مهنته الطبية )

الدوكتر:جاتله صدمة عصبية وخلاص كان مقرر يتجوز من دكتورة بشرية ومن وقتها بقى بيدعى لمختفية علشان بسببها عرف انه كان هياخد الصدمة اللى هيا

N:B
اوعوا تسمعوا كلام هاف دوك دى والنبى لحسن هنروح فى داهية (لو اختفيت فى ظروف غامضة ابقى اعرفوا ان حد من البنات صحابى قرا البوست ربنا يستر عليا)

بتوع طب ياعينى معنسين

االبوست ده عبارة عن شوية حكاوى بين كرنبة وعيلتها كرنبة دى بقى بنوتة فى طب بشرى (وهتموت وتتجوز وخايفة ياعينى انها تعنس) اسيبكم بقى مع كرنبة وعيلة كرنبة

اخو كرنبة:يلا ياكرنبة ياحبيتبى اديكى كبرتى وبقيتى عريس اد الدنيا

كرنبة :انا عريس اهئ اهئ اهئ يخرب عقلك ياواد انت بطل ياواد( تسيحلى فى المنطقة حرام عليك هتوقف حالى) تعرف ياواد انت انا لو عنست هيكون ذنبى فى رقبتك وعمرى ماهقدر اسامحك

وانا اللى كنت ناوية اجيبلك عروسة خلاص (انا هسك على الموضوع مافيش عرايس)


فى بيت كرنبة

مامة كرنبة :يلا ياكرنوبتى ان شاء الله اختك فرحها قريب وبعدين نفرح بيكى بعدها والعريس يجى

بابا كرنبة:يجى مين ده اللى يجى (يجى يهبب ايه دلوقت)

كرنبة : بتكلم نفسها(مين ده مش بابا ده) مش ده بابا اللى كان عايز يخلص منى (غيرة الاب بقى)
ز
وبعدين راحت قلبت على الوش الخشب بقى كده مهبب يابابا(اهئ اهئ اهئ)طب مش تستنى طيب لما يجى الاول وبعدين ندبسه وبعدين تقول عليه كده


كرنبة وهى فى اولى جامعة

خالة كرنبة :يلا ياكرنبوتى انتى ياقمر خلاص كبرتى ودخلتى الجامعة وقريب نفرح بيكى وتتخطبى وتبقى احلى عروسة فى الدنيا

كرنبة:بوش حزين
يااااااااااااااه ياخالتو (يامييييييييييين يعيش بقى ربنا يدينا ويديكى طولة العمر)

خالة كرنبة صعبت عليها كرنبة وقالتلها ياحبيبتى ياكرنبتى يقطع الطب وسنينه

كرنبة:ياخالتو ماتحاوليش تغيرى الموضوع عندى ابن حضرتك انا خلاص حجزته هو صح خمس سنين بس شغال وفى سرها كانت بتقول (اهو اربيه برضه واكسب فيه ثواب)

وفضلت تقول ياربى ياخوفك ياكرنبة لحسن على ايامك تلاقى( يااختى العرسان خلصوا واتسحبوا من السوق)

كرنبة قاعدة فى البيت

مع طنط صاحبة ماماتها اللى مش بتبطل لوك لوك لوك وكانت حاسة انها خلاص هتدبس فى ابن طنطتها دى

طنط:ياكرنبتى انا عندى ابنى الكبير بقى واد كده جامد جدا و زى القمر شبه الواد بتاع تايتنك

وكرنبة: فى سرها بتقول( شبه الوادبتاع تايتنك ولا شبه التايتنك نفسها )


طنط:وانا بدوره على عروسة زيك كده وفضلت تتكلم وانتى وانتى وانتى الخ الخ الخ .........

وكرنبة كل ده مسبهلة وعمالة تقول (مين الحاج ده ده انا ده ولا ايه)

كرنبة اصلها مش مصدقة وعملت نفسها عبيطة ياااااه ياطنط ابن حضرتك ده اخلاق جدا انا صح عمرى ماشفته بس اكيد زى حضرتك تمام(تقصد انه حجم عائلى زى مامته تمام )

ربنا يارب يكرمه ويرزقه بزوجة صالحة

طنط :اتضايقت طبعا من كرنبة وتحسها (كانت هتجرى وراها )وخلاص كرهتها

ومازالت الاخت كرنبة قاعدة بتحلم بالعريس وبتفكر وبتقول ربنا يسامحهم اللى كانوا السبب مالى انا ياربى بس ومال كلية المعنسين دى وهى دلوقتى (بتغنى اغنية امتى هتيجى امتى امتى)

انا الحقيقة دى اول مرة احاول اكتب فى اطار كوميدى يارب يكونى دمى ماكانش تقيل عليكم وتكون عجبتكم