عمر النت ماكان وسيلة ابدا كفاية انك تتعرف بحد

انا النهاردة حابة اتكلم عن النت وخصوصا الميل ومعرفة الناس مش عارفة ابتدى ازاى ياترى ابتدى بالمميزات ولا اللى العيوب

ز
ياترى اتكلم عن احسن بنات فى الدنيا عرفتهم ولا عن اكتر ناس بسببهم حزنت وفضلت اسأل نفسى هما ليه كده ؟وكانت دايما (الاجابة هى الدنيا كده)


زمان كنت بحب اعرف البنات واتكلم معاهم بس دلوقتى خلاص يمكن ده لانى اتخنقت من التصرفات السخيفة وده اللى خلانى بعدت فى الفترة الاخيرة


وبقى الميل بالنسبة ليا (اخر حاجة ممكن على النت افكر فيها )بزعل اوى كل لما افتكر اللى حصلى من كذا شهر لما بنت من صحابى عرفتنى على بنت تانية معايا نفس الجامعة


وورتنى صورتها وبعدين كنت بصادفها كتير قلت خلاص اروح اكلمها فى البداية كنت مترددة لانى ماكنتش متأكدة من شكلها بس استجمعت قوايا ورحت كلمتها بس اللاسف قابلتنى اسخف مقابلة فى الدنيا


تعرفوا وقتها حزنت جدااااااااااااااا لانها (على النت كانت غير كده ابدااااااا) كانت على النقيض للنقيض كانت بجد حد لذيذ ومن وقتها بقى فى من جوايا حاجز كبير غصب عنى

ز
لقيت نفسى ببعد وخصوصا ان فى س من الناس بدون ذكر اسماءكانت بتتعمد تعمل اوف لاين اول لما افتح ياترى هى فاكرة نفسها مين انا عندى اللى احسن منها بكتير بتواضعهم واخلاقهم علشان يعنى هى بتكتب شوية شعر مااحنا كمان بنكتب

(نفسى اقولها ليه الغرور ؟)بجد هتخسرى فى يوم مش عارفة ليه لما بفتكر المواقف دى بحزن اوى بس برضه


بفتكر البنات التانية اللى هما نفسهم يشوفونى ويعرفونى وبحبهم وبيحبونى حب فى الله بس للاسف اغلبهم من برة مصر
.ز
بدعى ربنا يجمعنا بيهم فى يوم لانهم قمة فى التدين والاخلاق اللى فى الدنيا واد ايه ثقافتهم عالية

ومن عالم التدوين

عرفت 3 بنات منهم 2 بموت فيهم ولحسن الحظ اننا نفس السن مع اختلاف الدراسة يمكن مش بنتقابل غير كل فين
وفين بس مش قادرة اقولكم بنبقى سعدا اد ايه


زمان كان عندى حق لما كنت دايما بقول (ان النت عمره ماكان وسيلة كفاية انك تعرف حد) وخصوصا لو كانت بالكتابة وانا مااقصدش بده ان كل البنات وحشين بل على العكس


فى مرة كنت اتعرفت على بنت وكانت تعرف اختى هى معايا طب برضه هى كانت لذيذة على النت اوكى بس فى الحقيقة ياربى ايه ده (رقة رقة بجد واخلاق وحبوبة جدا )


اول لما اتقابلنا حسيت نفسى اعرفها من سنين وقتها كنت مع الجروب بتاعى حتى صحابى استغربوا بيقولولى معقول اول مرة تشوفيها قلتلهم اه والله طبعا كانوا مندهشين جدا يمكن لاننا مابطلناش رغى


يااااااااااااه رجعتولى زكريات انما لازم تقولولى (عندى حق ولا لا )ان النت عمره ما كان كفاية علشان تعرف وتحكم على حد وخصوصا مع ضيق الوقت

معلش طولت عليكم بس كنت حاسة انى نفسى اتكلم عايزة اعرف هو انا بس اللى بفكر بالشكل ده ولا ياترى كل الناس كده فى انتظار تعليقاتكم

شفت اد ايه فايدة الجواز من دكتورة

1-عمرك ابدا ماهتطخن لان حضرتك (هتضيع) والاكل ده بالكتير هتشوفه مرة كل يوم وربنا وحده يعلم ده هيكون غدا ولا سحور


مش بعيد بعد شوية تلاقى نفسك( هيكل عظمى محتاج لحام) او انك تلاقى نفسك( بتختفى مع مرور الايام )


2-عمرك ابدا ماهتزهق منها لانك اصلا مش بتشوفها ولما تحس انك هتموت وتكلمها لازم فى الاول تتصل وتحدد ميعاد وده على (حسب مسئوليات وعمليات المدام)


يعنى ينفع او مش ينفع وفى النهاية هتحس انك بتطلب مقابلة( وزير الصحة )وممكن كمان( وزير الاسكان)

3-عمرك ماهتسمع خناق فى البيت (يعنى ولا دوشة ولا صداع ولااى نوع من وجع الدماغ )ببساطة لانها مش بتشوف الولاد



4-مش بعيد فى يوم تفتحلها الباب وتلاقيها بتقولك مين انت وانت تقولها (انا جوزك يامدام) وهى تقولك سورى اصلى مش شفتك من زمان


5-ممكن فى يوم تلاقى ابنك الصغير راجع من المدرسة بيندهك بابا بابا هو (يعنى ايه كلمة ماما ) اصل المدام مابقاش عندها وقت تربى عيال وشوف بقى وقتها هيكون شكلك ازاى

واد ايه انك عكس كل الابهات وانك ليك دور كبير فى حياة الواد


6- بس علشان حرام فى دكاترة ستات برضه بيربوا العيال وانت برضه لازم تعذر يعنى لو هى قامت الصبح وحضرت السندويشتات ممكن تلاقيها مش عارفة


هى لبست (عيالها ولا عيال الجيران) الست صاحية مش قادرة وعيونها مش شايفة فعلشان كده لازم تعمل check)على العيال كل يوم قبل ماتنام


7-وياسلام بقى لو انت كمان دكتور يبقى(for sure )مش هتشوفوا بعض غير فى الاعياد يعنى ياعم بقى هتحس بفرق كبير وانك بتعمل تغيير بس بقولك ايه اوعى


تقول قدام حد من صحابك لحسن هيحقدوا وانا الحقيقة خايفة عليك (انت عارف المصريين عيونهم مدورة و تأثيرها خطير على البشر)


N:Bوطبعا ياريت ماحدش يابنات يدايق منى انا طبعا بضحك واكيد نادر اوى اللى بالشكل ده واكيد فى مرة ان شاء المولى الرحمن نضحك كمان على الولاد اشمعنى احنا يعنى

اوعى تتجوزمن دكتورة بشرية

المرة اللى فاتت اتكلمنا عن كرنبة اللى هتموت وتلاقى عريس المرة دى بقى هنتكلم عن الانتيم بتاعتها اللى على النقيض للنقيض منها واسمها مختفية

كل تفكيرها فى الدراسة والكلية وكلمة عريس بتسببلها( ازمة قلبية وعلى الرغم من كده ياريتها بتحب الكلية )

اسيبكم مع مختفية بس اوعوا تدعوا عليا

الدوكتر :ايه رأيك فى الكلية ؟

مختفية:الكلية ياخبر يادوكتر يااااااااااااااه الكلية الكلية دى اقولك يادوكتر هو كان يوم اسود يوم مادخلت الكلية (شكلها معقدة نفسيا)

الدوكتر:ليه يامختفية ؟

مختفية: دى تأبيدة هيا ندخل 17 ونخرج 24 سبع سنين جوع وفقر( ياعينى عليا)

الدوكتر :هو ده كل اللى مزعلك يامختفية؟

مختفية :ياريت كان بس كده بصلى كده يادوكتر (وهتلاقينى شكلى شكل بنت فى اعدادية )

الدوكتر:كل ده فى سبيل العلم ايه يعنى (لما تختفى كل سنة شوية ده انتى هتأدى رسالة للبشرية وهتعملى خدمة قومية )

مختفية :يادوكتر حرام انا دخلت الكلية بكامل قوايا العقلية اما (دلوقتى دول بيقلوا شوية شوية)

الدوكتر :لالا يامختفية انتى بتبالغى شوية

مختفية :اقولك يادوكتر انا كل يوم الفجرية اصحى من نومى بسبب الكلية اصحى اشوف ايه عليا واخد الصدمة اللى هيا( اشى بكتيريا واشى دفتيريا)

الدوكتر :وايه يعنى مش قضية هيا

مختفية:يادوكتر انا فى اول سنة اكلينكية وخلاص( من الرمد اتحولت ومن الانف والاذن اتهبلت ومن الشرعى خلاص مت)

الدوكتر:ماهو لازم تعملى كده يامختفية علشان تبقى دكتورة شاطرة مفيدة للانسانية

مختفية :ياعينى عليا نفسى اخلص الكلية علشان انطلق واعيش بحرية

الدوكتر :يامختفية حرام عليكى هتصبينى( بالسكتة القلبية)

مختفية :سورى يادوكتر ماهو حضرتك اللى سألت وفى المواجع قلبت

الدوكتر :هانت يامختفية كلها كام سنة وتخلصى وتتخرجى من كليتنا دى واشوفك احلى عروسة فى الدنيا(وفى سره بيقول هتكون ماماته دعت عليه و هيغنى صعبان عليه)

مختفية:ايه يادوكتر ده من قالك انى هتجوز ده انا على بال مااخلص هيكون( شكلى خارجة من الاصلاحية)

الدوكتر:تعبت قلبى يامختفية

مختفية: سورى يادوكتر انا عارفة انى نكدية هتعمل ايه بس فيا والله عمرى ماكنت كده انا كنت بنوتة شقية بس كليتكم ديا هى اللى عملت كده فيا

ز
الدوكتر :تانى يامختفية (وفى سره بيقول انا استاهل انا ايه خلانى اكلمها وعلى الجامعة واسألها)هاتولى اقرب شوز اضرب نفسى بيه بس بشرط يكون جديد


مختفية :بقالى كام يوم مش بنام بسبب التفكير فى الامتحانات وادخل الاوضة بتاعتى وافضل اعد فى( مربعات سقفى وممكن كمان الجيران)

مختفية :وكل مااجى اتهور واغنى واسلك احبالى الصوتية الاقى نفسى بغنى غلطة وافضل معلقة عليها حالتى بقت صعبة ومحتاجة استشارية نفسية (ياخوفى على الدكتور واللى هيحصله من مختفية مش بعيد يعتزل مهنته الطبية )

الدوكتر:جاتله صدمة عصبية وخلاص كان مقرر يتجوز من دكتورة بشرية ومن وقتها بقى بيدعى لمختفية علشان بسببها عرف انه كان هياخد الصدمة اللى هيا

N:B
اوعوا تسمعوا كلام هاف دوك دى والنبى لحسن هنروح فى داهية (لو اختفيت فى ظروف غامضة ابقى اعرفوا ان حد من البنات صحابى قرا البوست ربنا يستر عليا)

تاااااااااااااااااااااااج

السؤال الاول :ماهى السعادة فى نظرك؟

السعادة فى نظرى انى احس ان مودى كويس انى انام وانا مرتاحة بدون ماافكر ممكن تكون كلمة طيبة بسمعها او ابتسامة صغيرة بشوفها ى يعنى تقدروا تقولوا بميل للمعنويات اكتر من الماديات

السؤال الثانى: كيف تصل إلى السعادة؟

اكيد برضا ربى ورضا ضميرى ورضا بابا وماماتى وانى ماازعلش حد منى

السؤال الثالث: هل السعادة وهم أم أنها حلم صعب؟

ماينفعش نقول عليها وهم السعادة حاجة جميلة اوى محتاجة شوية جهد شوية تعب علشان توصلها ممكن تكون حلم لناس كتير ووممكن تكون حقيقة لناس اكتر

السؤال الرابع: هل السعادة طريق للنجاح ؟وضح؟

انا افتكر العكس ان النجاح هو طريق السعادة او ممكن الاتنين بيكملوا بعض لان مثلا ماينفعش واحدة depressed وهينجح او يوصل لحاجة

السؤال الخامس: ماهى أكثر اللحظات التى شعرت فيها بالسعادة؟

يوم خطوبة اختى كان اسعد يوم وقتها كانت حضرتى اخت العروسة وكانت حاسة بحاجات عمرى فى حياتى ماحستها
بجد كان يوم حلو اوووووووووووى

السؤال السادس:هل ممكن أن تحقق كل شىء؟

افتكر لا صعب انى احقق كل شئ وخصوصا انى عندى طموحات هى صح مش مستحيلة بس صعبة انى احققها والمشكلة انها مرتبطة بانى اخلص دراستى واللى انا متأكدة منه انى على بالى مااخلص هكون خلصت

السؤال السابع: السعادة تجعلك تقبل على الحياة أم لا؟

طبعا اكيد

السؤال الثامن: هل أحسست يوما انك وصلت لقمة السعادة؟

الحقيقة ايوه وده كان يوم نتيجتى فى الثانوية العامة ربنا كرمنى بمجموع كويس ووقتها قدرت افرح حبيبى اللى يرحمه جدو ووقتها كان بيبكى من فرحته مش قادرة اقولكم كانت فرحتهم بيا اد ايه

السؤال التاسع: لماذا تمر أوقات السعادة بسرعة؟

علشان نعرف قيمتها ونحاول بكل وقوتنا نمسك فيها ومش بسهولة نسيبها

السؤال العاشر: هل ترى السعادة فى التدين؟

اكبر جزء من السعادة بيعتمد على التدين الواحد وهو قريب من ربنا بيحس بأمان كبير جدا

وبالتدين بتحس الامور اوضح مش بتحتاج تفكر

السؤال الحادى عشر: هل أنت متفاؤل وعندك أمل؟ وضح؟

الحقيقة لالا ويمكن لانى مقتنعة بمبدأ شوية غريب انى مش اتفائل علشان لو حاجة جت اقل ماانا اتمنتها او حلمت بيها

مااتصدمشومااكونش ضيعت وقتى فى اوهام ولكن لو جت كويسة يبقى كويس وابقى مااخسرتش اى شئ

السؤال الثانى عشر: إذا شعرت بالحزن ماذا تفعل؟

بكتب بشكى همى لنفسى بس الحقيقة دى اكتر طريقة فعالة بالنسبة ليا وقتها بكتب كل اللى حساه وبعد مااخلص بشوف كل اللى مدايقنى بشوف الامور اوضح قدامى بفكر بعمق اكتر وبعدين ارتاح وكنت قريت فى مرة حاجة لطيفة اوى انك لما تكتب اللى مدايقك فى ورق وبعدين ترميه يبقى انت كده كأنك اخدت كل الحزن اللى جواك خرجته ورميته

السؤال الثالث عشر: هل يستمر معك الحزن فترة ام ينقضى فى الحال؟

هو ده بيتوقف على سبب الحزن يعنى لو حاجة تخصنى اوى بحاول انساها واتغلب عليها على اد مااقدر بس لو حد جرحنى او غلط فيا بأى صورة من الصور مش بنسى بسهولة وكمان لو حد عزيز ليا وعنده مشكلة والمشكلة دى صعبة ومحتاجة صبر او مرض لقدر الله بحزن جدا وللاسف بطول اوى

السؤال الرابع عشر: ما رأيك فى الأفراد المتشائمين؟

هما يعنى مش وحشين اوى يعنى انا بعتبر نفسى حد منهم بس ياريت مش يكون التشاؤم اوفر اوى علشان كده وقتها هيشوف الدنيا بنضارة سودة وبعد يدخل فى مرحلة الاحباط وهيتحول لحد كئيب جدااااااااا حد وحش جدا

انا بشكر
mohamed ghalia وبقوله ميرسى جداااااااااااااااااا والتاج بجد حلو اوى
وانا بعتذر على التأخير معلش بجد انا اتطحنت وادعكت فى الكلية ولو فى حاجة اكتر شوية تعبر عن التعب والمجهود اللى عملناه الاسبوع ده كنت قلت

وميرسى مرة تانية