شاب وبنت

انا النهاردة حابة اتكلم عن الحب بين الشباب والبنات

والحقيقة كان عجبنى جدا البوست فى مدونة( همسات شاب) لما اتكلم عن الحكاية دى بس هو عرضها من وجهة نظره هو كشاب فأنا حبيت اتكلم عنها كبنت

.
انا ماماتى وبابا من الريف فانا اتربيت تربية الريف فالمبادئ دى مترسخة جوايا مترسخ جوايا ان ماينفعش ابدا ان البنت يكون ليها علاقة بشاب
.
.
الا فى( اطار الخطوبة) ممكن اكون معقدة زى ماكتير بيقولوا عنى ممكن تفكيرى من زمان اوى بس انا شايفة ان لما البنت تفضل تدى مشاعرها لغير الانسان اللى هتشاركه حياته
.

يبقى كده مش صح ابدا لانها غالبا هتنجرح وممكن تحاول تدخل فى تجربة تانية علشان تنسى الاولى ومع مرور الوقت مش هتكون عندها حاجة تديها او مشاعرها هتكون رخيصة من غير تمن
.
.
عارفين بالظبط زى ايه
البنت انا بعتبرها وردة لو هى اتعرفت بحد مش خطيبها ولاى سبب ماكملوش مع بعض
فالوردة خلاص حد قرب منها ريحتها اتغيرت مابقتش بنفس جمال شكلها فقدت رونقها
.
وسبحان الله ربنا مابيحرمش شئ من غير سبب
يعنى بنشوف بنات فى الجامعة كتير بيتعرفوا بشباب وللاسف اكتر من 90 فى الميه من العلاقات دى مش بتنتهى بالزواج
وده لسبب بسيط جدا ان كل واحد منهم عرف التانى بمافيه الكفاية مابقاش عنده فضول يعرف اى شئ عنه

وفى سبب تانى
ممكن الشاب ده فقد الثقة فى البنت دى وقال زى ماعرفتنى ممكن تعرف حد تانى ولو ان ده ظلم بس ده غالبا اللى بيحصل
.
زمانكم دلوقتى بتقولوا انى مشاعرى جامدة وان ماينفعش اللى انا بقوله وان مافيش حد بيتحكم فى مشاعره
.
بس اللى انا متأكدة منه ان اى حب فى الدنيا بيبتدى باعجاب يبقى خلاص هي دى الفترة اللى ممكن تعمل فيها كنترول لان مشاعر البنات مش لعبة
.
وكمان مشاعر الولاد حرااااااام بجد وياريت اى شاب مايحاولش يبتدى اى علاقة غير لما يكون متأكد انه مستعد للزواج من البنت دى لان زى مابيقولوا حرام بنات الناس
.
وبنشوف فى الجامعة وبنسمع عن قصص كتير
طب ليه احنا مانخليش وقت الدراسة للدراسة ونخلى وقت للخطوبة للخطوبة على الاقل يبقى ليها معنى وقتها تحسى بفرق فى حياتك
.
لكن فى ناس كتير بتضيع فى دراستها بس قصص فاشلة كتير
كل اللى انا نفسى فيه اننا نرجع لدينا من تانى وياريت مانشوفش الانفتاح الفظيع اللى حاصل ده
.
ويارب يهدى شباب وبنات المسلمين جميعا
ويجمع المتحابين فى الله بالزواج
.
واسفة لو كنت طول عليكم